Юныя бярэзінскія футбалісты з ліку навучэнцаў раённай дзіцяча-юнацкай спартыўнай школы алімпійскага рэзерву ўжо заўважаны вядучымі футбольнымі клубамі. Папоўніць рады таленавітых аматараў скуранога мяча яны змогуць у бліжэйшыя гады, як і дастойна заявіць пра талент свайго першага трэнера Сяргея Васільевіча Булойчыка.
Нядаўна навучэнцы 2006 года нараджэння парадавалі свайго педагога шыкоўным выступленнем на першынстве Мінскай вобласці па міні-футболе. Тут яго “юныя таленты” начыста разграмілі большасць сваіх сапернікаў і прымусілі ўсіх з гонарам гаварыць аб бярэзінскай школе футбола.
Прэстыжнаму першынству папярэднічаў турнір у Лагойску, дзе роўных бярэзінцам не знайшлося і яны ўпэўнена сталі лідарамі. У фінале нашы хлапчукі згулялі з лікам 2:1 з камандай з футбольнага клуба “Ислочь”. З рашучым настроем на перамогу адправіліся футбалісты і на першынство Мінскай вобласці, дзе даказваць высокі клас гульні ім давялося сярод каманд дзіцяча-юнацкіх спартыўных школ, дзіцяча-юнацкіх школ алімпійскага рэзерву і футбольных клубаў. Бярэзінская каманда ўжо ў ходзе занальнага этапу ў пух і пер’е разбіла футбалістаў з Пухавіцкага, Чэрвеньскага і Смалявіцкага раёнаў. Ды і з якім лікам! У вароты чэрвеньцаў яны забілі 11 мячоў, а ў іншыя – па 9! Пры гэтым самі прапусцілі толькі адзін мяч.
У фінале бярэзінцам ужо давялося няпроста, бо на спартыўнай пляцоўцы іх чакалі каманды футбольных клубаў “БАТЭ”-Барысаў, “Август-Бел”, Маладзечанскага, Стаўбцоўскага раёнаў. Аднак трэба аддаць належнае нашым хлапчукам: яны змагаліся за кожную перадачу, кожны мяч і выйгралі ў дзвюх з чатырох гульняў. Фінальнай для іх стала сустрэча з камандай “Август-Бел”, якая скончылася з лікам 9:0 на карысць бярэзінцаў.
У выніку каманда Бярэзінскага раёна заняла трэцяе месца, прапусціўшы наперад толькі каманды футбольнага клуба “БАТЭ”-Барысаў і Маладзечанскага раёна.
Бліскучая перамога на абласным футбольным першынстве прымушае назваць пайменна ўсіх членаў каманды і трэнераў. Гэта варатар Канстанцін Благародны, які названы лепшым у вобласці, Мікіта Цуранаў, Мікіта Круталевіч, Антон Алейнікаў, Даніла Корсук, Іван Хасеневіч, Ілья Цыбульскі, Арсеній Заяц, Ягор Дыгадзюк, Аляксандр Грыбко і, вядома, самы выніковы ігрок спаборніцтваў Аляк
сандр Рогаў. Шэраг гэтых будучых футбольных зорак трэніраваліся ў Івана Іванавіча Саскаўца і Віктара Паўлавіча Несцяровіча.
У сваю чаргу, усе трэнеры хлапчукоў шчыра ўдзячны іх бацькам, у прыватнасці, матулям, якія на працягу ўсіх спаборніцтваў падтрымлівалі сваіх сыноў і не стамляюцца верыць у іх шчаслівую спартыўную будучыню.
Мілана ТРАПЯНОК.
«БЯРЭЗІНСКАЯ ПАНАРАМА»