Новости

10.06.2022

Раённы школьны баль-2022!

Сёлета раённы школьны баль прайшоў па новых традыцыях. Упершыню ен пачаўся ў гарадскім скверы каля помніка воінам і партызанам, якія загінулі ў гады Вялікай Айчыннай вайны. Тут кіраўніцтва раёна разам з выпускнікамі 2022 года ўшанавалі памяць загінуўшых хвілінай маўчання і ўсклалі кветкі да манумента героям.

Затым урачыстае шэсце выпускнікоў велічна накіравалася на гарадскую плошчу. Узначальвалі яго старшыня райвыканкама Дзяніс Дзішук, начальнік галоўнага ўпраўлення па адукацыі Мінаблвыканкама Мікалай Башко, начальнік упраўлення па адукацыі, спорце і турызме райвыканкама Алеся Цітова і старшыня ветэранскай арганізацыі Бярэзінскага раёна Анатоль Зябко.

Гучнымі апладысментамі бярэзінцы віталі ўсіх 160 выпускнікоў 2022 года з іх педагогамі і дырэктарамі ўстаноў адукацыі. У іх гонар гучалі віншаванні, пажаданні і боскія бласлаўленні, душэўныя песні і тройчы грымеў школьны вальс.

Прыемным сюрпрызам традыцыйнай цырымоніі стала ўшанаванне класных кіраўнікоў і вучняў, якія пакінулі свой яркі след у гісторыі школ. Яны на роўных з залатымі медалістамі атрымлівалі свае ўзнагароды.

Завяршыўся школьны баль на шчымлівай ноце развітання з дзяцінствам - у неба рашуча ўзняліся ўверх паветраныя шарыкі з папяровымі бабачкамі, якія сімвалізуюць дзіцячыя мары. Няхай яны нясуць выпускнікам у дарослае жыццё новыя ўражанні, удачу і здзяйсненне мараў!