Апошні званок прагучаў сёння ў Бярэзінскай гімназіі для 44 выпускнікоў 11 класа і 51 выпускніка 9 класа, сярод якіх 4 “залатыя медалісты” і 3 атрымалі пасведчанні з адзнакай.
Словы настаўлення і добрых пажаданняў выпускнікам, а таксама ўдзячнасці бацькам і педагогам прагучалі ад кіраўніка справамі Бярэзінскага райвыканкама Міхаіла Бурцава, начальніка ўпраўлення па адукацыі, спорце і турызме Алесі Цітовай, дырэктара навучальнай установы Наталлі Бурцавай.
Выпускнікі выступілі са словамі ўдзячнасці ў адказ. Шмат гіназістаў былі ўзнагароджаны граматамі і дыпломамі за поспехі ў розных накірунках дзейнасці.
Да віншаванняў далучыўся таксама старшыня раённай арганізацыі Беларускага саюза воінаў-афганцаў Алег Купіч.
Дырэктар гімназіі Наталля Бурцава была адзначана падзякай Бярэзінскага райвыканкама за добрасумленную працу, прафесіяналізм і значны асабісты ўклад ў грамадска-палітычнае развіццё Бярэзінскага раёна.
Напрыканцы выпускнікі ўпрыгожылі ўрачыстасць цудоўным вальсам з выдатнай харэаграфіяй.
Шмат усмешак, усхваляванасці і радасці было сёння на тварах выпускнікоў, педагогаў і бацькоў падчас урачыстай лінейкі, што прайшла ва ўстанове адукацыі “Пагосцкі навучальна-педагагічны комплекс дзіцячы сад- сярэдняя школа”.
Словы віншаванняў і на дарогу ў дарослае жыццё адзінаццацікласнікам прысвячалі дырэктар школы, першы настаўнік і класны кіраўнік выпускнікоў, бацькі і, безумоўна, першакласнікі. Чулліва і ўзнёсла дзячылі сваіх педагогаў віноўнікі свята. Іх сёлета восем, і ў кожнага наперадзе вялікія планы, здзяйсненні і светлы шлях.
З пажаданнямі знайсці сябе і стаць надзейнымі грамадзянамі роднай Беларусі да выпускнікоў звярталіся шаноўныя госці лінейкі - начальнік галоўнага ўпраўлення спорту і турызму Мінаблвыканкама Яўген Булойчык, намеснік начальніка ўпраўлення па адукацыі, спорце і турызме райвыканкама Ала Петруковіч і намеснік начальніка аддзела жыллёва-камунальнай гаспадаркі райвыканкама Анастасія Баярэвіч. На мерапрыемства яны прыбылі не з пустымі рукамі: так, Яўген Булойчык у якасці падарунка ўручыў дырэктару школы Наталлі Жыгар сертыфікат на 20000 рублёў на ўмацаванне матэрыяльна-тэхнічнай базы ўстановы адукацыі.
У завяршэнні свята выпускнікі прайшлі свой апошні, развітальны круг гонару.
«Последний звонок, простые слезы...». Гэтай шчымліва-наіўнай песняй і першым вальсам выпускнікоў скончылася свята апошняга школьнага званка ў ДУА «Сярэдняя школа №2 горада Беразіно».
Яно атрымалася назвычай душэўнымі і цёплым з ноткамі гумару, трапнымі жартамі, арыгінальнымі танцамі і спевамі, з першымі слязьмі тужлівага развітання на вачах юнакоў і дзяўчат.
Скончылася іх шчаслівае дзяцінства. Як адзін момант праляцелі гэтыя адзінаццаць гадоў у цікавых справах, школьных занятках і факультатывах, зборах і канцэртах, цікавых сустрэчах і шчырых размовах з педагогамі. Яшчэ крыху і яны назаўсёды пакінуць школьныя калідоры і класы, дзе ім знаёмы кожны куточак. Наперадзе яшчэ выпускныя экзамены і школьны баль. Таму трэба паспяшацца як мага хутчэй аддзячыць за старанне і клопат, цярпенне і вытрымку педагогам, бацькам за веру ў іх сілы і шчаслівую зорку. Ды і абавязкова загадаць запаветнае жаданне ў час апошняга званка і пакінуць свой яркі і непаўторны след у гісторыі школы.
Дзеля гэтага школа з раніцы была гатова да свята, паўсюдна лунаў настрой галоўнага школьнага свята, стаяў водар ружаў і мільгацелі паветраныя шарыкі. Ды і шматлікія госці спяшаліся павіншаваць выпускнікоў і ўстанову са святам.
Так, у ліку паважаных гасцей у СШ №2 былі старшыня райвыканкама Дзяніс Дзішук, яго намеснк Уладзімір Навіцкі і начальнік Мінскага абласнога фінансавага ўпраўлення Мікалай Кухарэнка.
- Вось і праляцелі школьныя гады,- звярнуўся Дзяніс Ігаравіч да выпускнікоў, - яны застануцца ў вашай памяці самымі яркімі і запамінальнымі, будуць рэць душу і ўздымаць настрой усё дарослае жыццё. Цяпер перад вамі адкрыты ўсе дарогі і ад вас патрабуецца не памыліцца з выбарам, каб у будучым уславіць не толькі свой раён, але і родную краіну.