Падвяла вынікі работы, расказала пра прафілактычныя мерапрыемствы намеснік старшыні камісіі па справах непаўналетніх райвыканкама Святлана Бондар.
З асноўным дакладам аб выніках работы камісіі па справах непаўналетніх райвыканкама выступіла намеснік старшыні камісіі па справах непаўналетніх Святлана Бондар
— За 1 квартал 2020 года, у параўнанні з аналагічным перыядам мінулага, на тэрыторыі Бярэзінскага раёна не дапушчаны рост супрацьпраўных дзеянняў, учыненых падлеткамі або з іх удзелам, — заўважыла Святлана Іванаўна.
За справаздачны перыяд на разгляд у камісію па справах непаўналетніх паступіў 21 (2019 — 24) матэрыял. Фактаў, звязаных з самавольным пакіданнем дзецьмі дамоў або дзяржаўных устаноў, няма. У мінулым годзе быў адзін такі выпадак.
Разгледжана і вынесена 13 (2019 — 15) пастаноў па справах аб адміністра-цыйных правапарушэннях.
У тым ліку: у дачыненні да непаўналетніх — 6 (2019 — 13), да законных прадстаўнікоў — 7 (2019- 2). Падлеткі ўчынілі: 3 дробныя хуліганствы, распіццё і ўжыванне алкагольных напояў — 1 (2), парушэнне правілаў дарожнага руху — 2 (11). Адзін падлетак разглядаўся на пасяджэнні камісіі за паўторнае ўчы-ненне правапарушэнняў.
Узрасла колькасць правапарушэнняў з 5 да 9 з боку школьнікаў устаноў адукацыі раёна.
На жаль, нягледзячы на мерапрыемствы прафілактычнага характару, у ДУА «Сярэдняя школа № 2 г. Беразіно» адзначаны рост супрацьпраўных учынкаў сярод вучняў (з 2 да 7).
12 супрацьпраўных дзеянняў падлеткі ўчынілі ў г. Беразіно (2019 — 10), 1 — за межамі Бярэзінскага раёна. Большасць правапарушэнняў здзейснены ў
вячэрні і начны час, па дні тыдня — большасць зафіксавана ў пятніцу — 8, у сераду і суботу — па 2, нядзелю – 1. Гэта, на жаль, гаворыць аб адсутнасці належнага кантролю за дзецьмі з боку бацькоў.
— 11 правапарушэнняў здзейснены юнакамі, дзяўчатамі — 2. Зніжана колькасць непаўналетніх, разгледжаных на камісіі за распіццё спіртных напояў.
Індывідуальная прафілактычная работа ў Бярэзінскім РАУС праводзіцца з 24 падлеткамі, — гаварыла С. Бондар.
За справаздачны перыяд надзвычайных здарэнняў, звязаных з гібеллю дзяцей, як і ў 2019 годзе, не дапушчана. Аднак варта звярнуць увагу на рост, з 3 да 11, выпадкаў траўміравання дзяцей. Зафіксаваны 1 парасуіцыд, 3 тэрмічныя і хімічныя апёкі, 6 удараў і пераломаў, 1 неасцярожнае абыходжанне з ртутным тэрмометрам.
У рабоце пасяджэння прынялі ўдзел намеснік начальніка ўпраўлення па адукацыі, спорце і турызме Ала Петруковіч, пракурор Бярэзінскага раёна Дзмітрый Макарэвіч, намеснік старшыні райвыканкама, старшыня камісіі па справах непаўналетніх Уладзімір Навіцкі, начальнік аддзела ідэалагічнай работы, культуры і па справах моладзі райвыканкама Галіна Сакалоўская
— Галоўная задача камісіі — дапамагчы «складаным» сем’ям. Таму праводзіцца велізарная прафі-лактычная работа: рэйды, індывідуальныя гутаркі, кансультацыі… Да прыкладу, праведзены міжведамасны комплекс прафілактычных мерапрыемстваў «Бяспечныя канікулы». Прайшла і міжведамасная прафілак-тычная акцыя «Сябруем з законам». Дзякуючы сумеснай, мэтанакіраванай рабоце ў 1 квартале 2020 г., у параўнанні з аналагічным перыядам мінулага года, знізілася колькасць злачынстваў і адміністрацыйных правапарушэнняў сярод непаўналетніх, — зазначыла С. Бондар.
Аб тым, як вядзецца работа з падлеткамі, што стаяць на розных відах уліку, гаварыла намеснік начальніка ўпраўлення па адукацыі, спорце і турызме Ала Петруковіч. Яна заўважыла, што да кожнага школьніка імкнуцца знайсці індывідуальны падыход, зацікавіць. Пра гурткі ва ўстановах культуры раёна, якія наладжаны для падлеткаў, расказала начальнік аддзела ідэалагічнай работы, культуры і па справах моладзі райвыканкама Галіна Сакалоўская.
Станоўча ацаніў работу камісіі намеснік старшыні райвыканкама Уладзімір Навіцкі.
— Галоўная задача нашай прафілактычнай работы — каб падлетак зрабіў правільныя высновы і больш не здзяйсняў злачынстваў, правапарушэнняў, — заўажыў Уладзімір Міхайлавіч. — Вельмі важна гутарыць з непаўналетнімі, правільна тлумачыць, чаму нельга так рабіць, чым пагражаюць падобныя ўчынкі. І тут галоўнае, каб падлеткі не замкнуліся ў сабе, а зразумелі свае памылкі і імкнуліся іх выправіць. Неабходна працаваць і з бацькамі, тлумачыць ім, нагадваць, што іх задача — клапаціцца пра дабрабыт сваіх дзяцей.