Што рабіць кіраўніку, калі яго падначалены бясконца “дыміць” і ніяк не можа развітацца з цыгарэтай? Другі ўвесь час даймае скаргамі на дрэннае самаадчуванне. Трэці ніяк не можа справіцца з элементарным даручэннем і з панядзелка чакае выхадных, каб адлежваць бакі на канапе. Чацвёрты бясконца глытае лекі і гугліць у інтэрнэце самыя дзейсныя сродкі для самалячэння. Спадзявацца, што такі калектыў дасягне пэўных вышынь, надзеі ніякай няма, ды і сумна ў ім жывецца не толькі кіраўніку, але і яго камандзе.
Аднак узняць працоўны настрой, абудзіць энергію і пазітыў рэальна… Дастаткова наладзіць у калектыве спартакіяду! Так як гэта чацвёрты год запар робяць у ДЛГУ “Бярэзінскі лясгас”.