“РАСЦІ, САША, ГОДНЫМ ЧАЛАВЕКАМ!” –
з такім пажаданнем вучню-васьмікласніку “Сярэдняй школы №3 г. Беразіно” да Аляксандра Стэфанскага завітаў напярэдадні Новага года старшыня Бярэзінскага райвыканкама Аляксандр Мікалаевіч Бабічаў, які далучыўся да рэспубліканскай акцыі “Нашы дзеці” і ўручыў падлетку навагодні падарунак.
Аляксандр Стэфанскі і яго матуля Наталля Хачатран вельмі ўдзячныя за перадсвяточны візіт і ўвагу старшыні Бярэзінскага райвыканкама Аляксандру Мікалаевічу Бабічаву
Жыццё ў кожнага складваецца па-рознаму. Аднак трэба імкнуцца ў свой час набываць неабходныя веды ў школе, потым атрымаць спецыяльнасць па душы, каб годна працаваць і годна жыць.
— Усё ў тваіх руках, — даваў наказ хлопчыку Аляксандр Мікалаевіч.
Гадуецца Саша ў няпоўнай сям’і, выхаваннем яго займаецца матуля Наталля Марцікаўна Хачатран, якая працуе станочніцай ТАА “Профітсістэм”.
Жанчына цікавіцца паспяховасцю сына ў школе, яго паводзінамі, падтрымлівае сувязь з класным кіраўніком, наведвае бацькоўскія сходы. Аднак, магчыма, хлопчыку не хапае мужчынскага ўдзелу ў яго выхаванні: Саша трапіў у спіс тых, хто знаходзіцца ў сацыяльна-небяспечным становішчы, нягледзячы на свае дастатковыя здольнасці ў навучанні (сярэдні бал – 6,7) і ўвагу да патрабаванняў і парад настаўнікаў.