Думаю, многія ў мінулую суботу звярнулі ўвагу на хлопчыкаў і дзяўчынак у спартыўнай вопратцы, з картай і компасам у руках, з задуменным позіркам і загадкавай усмешкай. Яны бегалі, штосьці шукалі… Што? Адказ просты. Каля возера на вуліцы Перамогі праходзіла спартыўнае абласное свята “Вясенні компас2018”.
Арганізатары спаборніцтва – упраўленне спорту і турызму Мінскага абласнога выканаўчага камітэта, аддзел адукацыі, спорту і турызму Бярэзінскага райвыканкама, дзяржаўная ўстанова адукацыі турыстычны цэнтр “Юнацтва”, што ў вёсцы Жорнаўка, клуб спартыўнага арыентавання “Беразіно”, федэрацыя спартыўнага арыентавання Мінскай вобласці.
— Бярэзінскі раён рады бачыць вас у гэты вясновы сонечны дзень, вітаў удзельнікаў галоўны суддзя спаборніцтваў Дзмітрый Мікалаевіч Ванькевіч. - Поспехаў вам і годных перамог!
Аматараў спартыўнага арыентавання на бярэзінскай зямлі сабралася багата з розных куточкаў Міншчыны: з Пухавіцкага, Смалявіцкага, Старадарожскага раёнаў, гарадоў Чэрвеня, Барысава, Магілёва, Жодзіна. Змагаліся ўдзельнікі паміж сабой у спрынтарскім арыентаванні, азімутальным бегу, хуткасным кампасціраванні, у лаберынце «Арыент-шоу».
Стомленыя, расчырванелыя ад ветру, магчыма, крыху падзагарэлыя ад вясенніх сонечных прамянёў усе з нецярпеннем чакалі вынікаў. Спачатку аб’явілі пераможцаў у індывідуальным заліку ў розных узроставых катэгорыях. А затым… Трэцяе месца заняла каманда з горада Жодзіна, другое - са Старадарожскага раёна і трыумфальная перамога каманды нашага раёна. Віншуем!